សម្បកក្រៅកាយឆ្ងាយតម្លៃ

យប់យន់ចងចិត្តលើកប៉ាកកា
រៀបរាប់កត់ចារមនុស្សឥឡូវ
មានគ្រប់សុទ្ធសព្វខុសជាងត្រូវ
លាយឡំយូរទៅមនុស្សឫស្យា ។

បរិយាយពីស្រីលៃប្រឹងកែ
បម្រុងថ្នមថែភ្លើងតណ្ហា
លៃលកពង្វក់ខ្សែនេត្រា
គ្រប់រូបជនាឱ្យវង្វេង ។

រីពួកប្រុសព្រើលផ្គើនហួសប្រាណ
អាងទ្រព្យមានបានអួតឥតក្រែង
លិបលលួចលាក់នឹងស្រីក្មេង
តម្កើងក្ដែងៗអាងយសស័ក្ដិ ។

សម្បកក្រៅកាយឆ្ងាយតម្លៃ
បែរមនុស្សប្រុសស្រីខំតែងតាក់
សម្ងើចសម្ញែងក្លែងបំពាក់
បង្អួតបណ្ដាក់កាយសម្រស់ ។

រូបអើយទាញចិត្តមនុស្សឱ្យស៊ុន
ចេតនាជាប់កុនផុងធ្លោយថ្លោះ
លែងបានគិតអ្វីឱ្យឆ្ងាយខ្ពស់
វិលវល់ពុលឈ្លក់នឹងអាត្មា ។

Follow Us