តើអ្វីទៅជាស្នេហាពិត?

"ស្នេហាពិត​"មានលក្ខណៈសីុជំរៅណាស់​  វាមានរសផ្អែមល្ហែមនិងកក់ក្តៅបំផុតក្នុងជីវិតមនុស្ស តែអភព្វណាស់ដែលមានជីវិត​ មនុស្សភាគតិចបំផុត​ អាចបានស្គាល់រសជាតិនៃស្នេហាពិតនោះ។  ការ"លះបង់"ដែលមានលក្ខណៈយល់យ៉ាងសីុជំរៅ​ និងលំអិត​ អំពីមនោរម្មណ៍​ដៃគូ​ទៅវិញទៅមក និងការយល់យ៉ាងត្រឹមត្រូវអំពីតំលៃនៃ​ការលះបង់នោះ​ ជាលក្ខណៈមិនអាចខ្វះបាននៃ"ស្នេហាពិត"។ មានក្តីស្រឡាញ់បែបហួងហែងដែលជាក្តីស្រឡាញ់បែបស្នេហាហើយ​ មានភាពស្មោះត្រង់នឹងក្តីស្នេហានោះហើយ​ តែបើសមត្ថភាពនៃការយល់ពីមនោរម្មណ៍នៃដៃគូមិនបានសីុជំរៅទេ​ នោះទំនាក់ទំនងស្នេហារបស់ពួកគេក៏នៅតែមិនអាចបង្កើតបានជំរកអត់រូបដ៏កក់ក្តៅមួយសំរាប់ជីវិតពួកគេដែរ។ ស្នេហាពិត​ ត្រូវតែបង្កើតបានជំរកគ្មានរូបរាងមួយដែលផ្តល់នូវភាពក្តៅបំផុត​ដែលគ្មានជំរកណាលើលោកអាចផ្តល់ភាពកក់ក្តៅស្មើនឹងជំរកដែលបង្កើតឡើងដោយស្នេហាពិតឡើយ។ គ្មានស្នេហាពិត​ ជីវិតពិតជាឯកោណាស់​ អន្ទះអន្ទែងណាស់​ សោកសង្រេងណាស់ ល្ហល្ហេវណាស់​។ ដោយមិនផ្អែកលើភាពមានទ្រព្យឬអត់ទ្រព្យ​ ឬនៅឆ្ងាយឬជិតគ្នាឡើយ​ ទោះចំងាយរាប់លានយោជពីគ្នាក៏ដោយ​ ក៏ជំរកដែលបង្កើតដោយស្នេហាពិតនោះ​ នៅតែអាចផ្តល់ភាពកក់ក្តៅ​ ផ្អែមល្ហែម​ និងការរំភើបញាប់ញ័រដល់ជីវិតគូស្នេហ៍នៃស្នេហាពិតនោះបានដែរ។ ដោយភាពឯកកោ​ខ្លាំងពេក​ និងចិត្តដែលមានតំរូវការភេទខ្ពស់​ មនុស្សច្រើនបំផុតបានយកស្នេហាយ៉ាងរោលរាលបែបជាស្នេហាភេទ​ មកធ្វើជាជំរកអោយជីវិតពួកគេ​ ជំនួសអោយជំរកដែលបង្កើតដោយស្នេហាពិត។ ការផ្តល់អោយក្នុងស្នេហាពិត​ មានលក្ខណៈជាការលះបង់​ តែការផ្តល់អោយក្នុងស្នេហារោលរាលបែបភេទ​ ត្រឹមតែជាការផ្គាប់ផ្គុន​ យកចិត្តយកថ្លើម​ ដើម្បីបានសំរេចរឿងភេទតែប៉ុណ្ណោះ។ ស្នេហានាំមុខដោយភេទ​ ធ្វើអោយជីវិតរបស់ពួកគេ​ ស្គាល់ត្រឹមតែតំលៃនៃការរួមភេទតែប៉ុណ្ណោះ​ ពួកគេត្រូវការគ្នាណាស់​ ស្ទើរបាត់មុខគ្នាមិនបាន​ តែមិនមែនព្រោះមនោសញ្ចេតនាដែលពួកគេមានចំពោះគ្នានោះទេ​ គឺព្រោះតែភាពជាដៃគូរួមភេទដ៏សីុសង្វាក់គ្នារបស់ពួកគេនោះឯង​ ដែលពួកគេនឹករកគ្នាមិនឈប់មិនឈរនោះ។ ស្នេហាប្រភេទនេះ​ ពួកគេក៏មានអារម្មណ៍ថាជាជីវិតផ្អែមល្ហែមមិនអាចខ្វះបានរបស់ពួកគេដែរ​ តែទោះយ៉ាងណាវាមិនមែនជាខ្សែជីវិតកក់ក្តៅដែលបង្កើតដោយស្នេហាពិតឡើយ​ ព្រោះស្នេហាបែបសត្វរបស់ពួកគេនេះពួកគេមិនបានស្គាល់រសជាតិផ្អែមល្ហែមនៃការលះបង់​ និងការទទួលបានការលះបង់នៃគូជីវិតរបស់ពួកគេឡើយ។ មានស្នេហាម្យ៉ាងទៀត​ ដែលពួកគេប្រើមនោសញ្ចេតនាតែម្យ៉ាង​ តែពួកគេមិនបានពាល់ត្រូវតំលៃឡើយ។ ពួកគេឈ្លោះប្រកែកគ្នាជាញឹកញាប់​ គ្មានភាពផ្អែមល្ហែមក្នុងជីវិតទេ​ ហើយរឿងភេទរបស់ពួកគេក៏មិនខ្លាំងក្លាប៉ុន្មានដែរ​ តែពួកគេមិនបានបែកគ្នាទេ​ ព្រោះពួកគេផ្អៀងដោយមនោសញ្ចេតនាតែម្យ៉ាង​ ពួកគេនៅនឹកឃើញនេះ​ នឹកឃើញនោះដែលធ្វើអោយពួកគេចិត្តមិនដាច់ពីគ្នា។ ស្នេហាប្រភេទនេះ​ មិននាំមុខដោយភេទទេ​ គឺនាំមុខដោយមនោសញ្ចេតនាតែម្យ៉ាង។ ស្នេហាពិត​ ត្រូវតែជាចំណងស្នេហ៍ដែលនាំមុខដោយមនោសញ្ចេតនា​ និងតំលៃ។ ជាប្រភេទស្នេហាផ្អែមល្ហែម​ កក់ក្តៅ​ និងភ្លឺស្វាងបំផុត។ គឺជាប្រភេទស្នេហាដែលកើតមានដោយកម្របំផុតក្នុងជីវិតមនុស្ស៕